Milli Hidrometeorologiya Xidmətinin məlumatına görə, yaxın günlər ərzində ölkə ərazisində soyuq və kəskin hava şəraitinin müşahidə olunacağı proqnozlaşdırılır. Bu dövr ərzində temperaturun xeyli enəcəyi, sulu qar və qar yağıntısının intensiv şəkildə olacağı gözlənilir. Həmçinin, dağlıq və dağətəyi rayonlarda yolların buz bağlayacağı, güclü külək əsəcəyi də xəbər verilir.

Fövqəladə Hallar Nazirliyinin (FHN) Arazmedia.az-a verdiyi məlumata görə, bu hava şəraiti ilə bağlı əhaliyə müraciət edilərək, müvafiq təhlükəsizlik qaydalarına ciddi riayət etməyə çağırılır. Eyni zamanda, soyuq və yağıntılı hava şəraitinin qaz və elektrik qızdırıcı cihazların istifadəsini artırması səbəbindən, elektrik şəbəkəsinin həddindən artıq yüklənməsi, nasaz və qeyri-standart qızdırıcı cihazlardan istifadə problemlərə yol aça bilər.

Bununla yanaşı, nasaz, qeyri-standart və ya kustar üsulla hazırlanmış cihazların istifadəsi ehtiyatsızlığın yanğınla nəticələnməsi və karbon qazı təhlükəsi yarada bilər. Bu səbəbdən, istifadə olunan qızdırıcı cihazların təhlükəsizliyi təmin edilməli, elektrik şəbəkəsi həddindən artıq yüklənməməli və cihazlar nəzarətsiz qoyulmamalıdır. Eyni zamanda, qızdırıcı cihazların yaxınlığında yanar maddələr və asan alovlanan mayelərin saxlanılmaması tövsiyə olunur. Həmçinin, istehsalçıların tövsiyələrinə uyğun olaraq cihazlardan istifadə edilməlidir.

Dağlıq ərazilərdə yaşayan və dağlara səfər edən insanlara da rəsmi qurumların hava şəraiti ilə bağlı proqnozlarına diqqət yetirmələri, zəif hava şəraitində mümkün qədər yaşadıqları bölgəni tərk etməmələri və gediş yönləri barədə əvvəlcədən yaxınlarını məlumatlandırmaları tövsiyə edilir. Avtomobil səfəri zamanı isə, avtomobilin texniki göstəricilərinin düzgün olması və kifayət qədər yanacaq ehtiyatının təmin olunması önəmlidir.

Həmçinin, qəza vəziyyətinə düşməmək üçün, ağır hava şəraitində xüsusilə qar uçqunu ehtimalı olan yerlərdən, dik yamaclardan uzaq durmaq, günün qaranlıq vaxtına qalmadan geri dönmək də tövsiyə edilir. Güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəkləri, naqillərlə və hündür ağacların altında dayanmamaq da unudulmamalıdır.

Güclü külək zamanı baş verən yanğınların söndürülməsi ilə bağlı çətinliklər nəzərə alınaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməsi tövsiyə olunur.

Mənbə: Yaxınlaşan soyuq və kəskin hava şəraiti ilə bağlı XƏBƏRDARLIQ