Rusiya Federasiyasının Prezidenti Vladimir Putin, dekabrın 28-də Azərbaycan Respublikasının Prezidenti İlham Əliyevə zəng edib.

Arazmedia.az-ın verdiyi xəbərə görə, telefon danışığı zamanı Vladimir Putin, dekabrın 25-də Bakı-Qroznı marşrutu üzrə uçuş yerinə yetirən “Azərbaycan Hava Yolları”na məxsus sərnişin təyyarəsinin Rusiyanın hava məkanında fiziki-texniki xarakterli kəskin müdaxiləyə məruz qalması və nəticədə baş vermiş faciəvi hadisə ilə bağlı üzr istədiyini ifadə edib. O, bu qəza nəticəsində həlak olanların ailələrinə və yaxınlarına dərin və səmimi başsağlığı verdiyini, xəsarət alanların tezliklə sağalmasını dilədiyini bildirib.

Prezident İlham Əliyev, “Azərbaycan Hava Yolları”na məxsus sərnişin təyyarəsinin Rusiyanın hava məkanında olarkən kəskin fiziki-texniki müdaxiləyə məruz qaldığını, idarəetməsini tam itirdiyini və Qazaxıstanın Aktau şəhərinə doğru yönləndirildiyini qeyd edib. Prezident, yalnız pilotların cəsarəti və peşəkarlığı sayəsində qəzanı eniş edə bildiklərini vurğulayıb. Dövlətimizin başçısı, təyyarənin gövdəsində çoxsaylı deşiklərin olmasının, hələ havada olarkən sərnişinin və heyət üzvlərinin təyyarənin göyərtəsinə dəlib içəri daxil olan yad hissəciklərlə yaralanmasının təsbit edildiyini bildirib.

Söhbət zamanı dövlət başçıları, bu faciənin bütün təfəriyyaratlarının ciddi və hərtərəfli araşdırılması və günahkarların məsuliyyətə cəlb edilməsi məsələsini müzakirə ediblər. Prezident İlham Əliyev, Azərbaycan tərəfinin təklifi ilə bu qəzanın səbəblərinin hərtərəfli araşdırılması üçün beynəlxalq ekspertlərdən ibarət heyət təşkil edildiyini və bu heyətin artıq fəaliyyətə başladığını qeyd edib.

Dövlət başçıları həmçinin, faciə ilə bağlı başlanılmış istintaq prosesinin tam şəffaf şəkildə aparılacağını və mütəmadi qaydada ictimaiyyətə məlumat veriləcəyini vurğulayıblar.

Mənbə: Putin İlham Əliyevdən üzr istədi