Rusiya Prezidenti Vladimir Putin, dekabrın 25-də Bakı-Qroznı marşrutu üzrə uçuş yerinə yetirən “Azərbaycan Hava Yolları”na məxsus sərnişin təyyarəsinin Rusiya hava məkanında baş vermiş qəzaya görə Prezident İlham Əliyevdən üzr istəyib. Bu məlumat Kreml tərəfindən yayımlanıb.

Telefon danışıqları, tərəflərin təşəbbüsü ilə baş tutub. Rusiya Federasiyasının Prezidenti Vladimir Putin, dekabrın 28-də Azərbaycan Respublikasının Prezidenti İlham Əliyevə zəng edib. Danışıqlar zamanı Putin, hadisənin baş verdiyi tarixdə “Azərbaycan Hava Yolları”na məxsus sərnişin təyyarəsinin Rusiyanın hava məkanında fiziki-texniki xarakterli kəskin müdaxiləyə məruz qaldığını və nəticədə baş vermiş faciə ilə bağlı üzrxahlığını ifadə edib.

Vladimir Putin həlak olanların ailələrinə və yaxınlarına dərin və ən səmimi başsağlığı verib, həmçinin xəsarət alanların tezliklə sağalmalarını diləyib.

Prezident İlham Əliyev, “Azərbaycan Hava Yolları”na məxsus sərnişin təyyarəsinin Rusiyanın hava məkanında olarkən kəskin fiziki-texniki müdaxiləyə məruz qaldığını bildirib. Bu müdaxilə təyyarənin idarəetməsini tam itirməsinə səbəb olub. Əliyev, təyyarənin Qazaxıstanın Aktau şəhərinə doğru yönləndirildiyini, yalnız pilotların sücaəti və peşəkarlığı sayəsində qəzaya eniş edə bildiklərini qeyd edib.

O, təyyarənin gövdəsində çoxsaylı dəliklərin olduğunu, havada olarkən sərnişin və heyət üzvlərinin təyyarənin göyərtəsinə daxil olan yad hissəciklərlə yaralandıqlarını vurğulayıb. Bu xüsusda, sağ qalan təyyarə bəladçıları və sərnişinlərin ifadələrinin kəskin fiziki-texniki müdaxilə faktını təsbit etdiyini bildirdi.

Söhbət zamanı dövlət başçıları, bu faciənin bütün təfərrüatlarının ciddi və hərtərəfli araşdırılması və günahkarların müvafiq məsuliyyətə cəlb edilməsini müzakirə ediblər. Prezident İlham Əliyev, Azərbaycana aid olan bu qəzaya səbəblərinin hərtərəfli araşdırılması üçün beynəlxalq ekspertlərdən ibarət heyətin təşkil edildiyini, bu heyətin artıq fəaliyyətə başladığını qeyd edib.

Dövlət başçıları, həmçinin faciə ilə bağlı başlanmış istintaq prosesinin tam şəffaf şəkildə aparılacağını və mütəmadi olaraq ictimaiyyəti məlumatlandıracaqlarını vurğulayıblar.