Ötən il fevralın 21-də valideynlərinin Bakı Sağlamlıq Mərkəzində diş həkiminə apardığı 11 yaşlı Xədicə Babazadə o vaxtdan bəri bir ildən çoxdur komadadır. Anası Sahnaz Mehdiyeva bildirir ki, istər yerli, istərsə də xarici həkimlər övladının nə vaxt ayıla biləcəyinə dair ümidverici sözlər demirlər.
S. Mehdiyeva həkimlərlə yanaşı, prokurorluq və ekspertizadan da narazıdır. Onun sözlərinə görə, Nərimanov rayon Prokurorluğunda gedən araşdırma obyektiv aparılmır, azyaşlı övladının bir ildən bəri yatmağa məhkum olmasına görə məsuliyyət daşıyanlar cəzasız qalırlar.

“Necə ki, günahkarlar layiqli cəzasını almır, Xədicə kimi qurbanlar çox olacaq”

“Belə hallarla bağlı ədalətli araşdırma aparılmır, günahkarlar layiqli cəzalarını almır, Xədicə kimi qurbanların, mənim kimi gözyaşlı anaların da sayı çox olacaq. Çünki cəzasızlıq mühiti yeni-yeni cinayətlərin artmasına yol açır,” – S. Mehdiyevanın sözləridir.
Valideynləri 11 yaşlı Xədicəni Bakı Sağlamlıq Mərkəzində diş həkimi Bəhruz Rüstəmovun yanına aparıblar. Anası bu həkimin qəbuluna “Instagram” vasitəsilə yazılıb. S. Mehdiyevanın dediyinə görə, ötən il fevralın 21-də uşağı müalicəyə apararkən onlara məlumat vermədən uşağa narkoz verilib. Nəticədə azyaşlı komaya düşüb: “Uşağın analizlərini götürmədən, çıxışını yoxlamadan, digər müayinələrini aparmadan narkoz verilib, nəticədə orqanizm dözməyib. Beyin uzun müddət oksigensiz qalib. Beyin hüceyrələri məhv olub.”
Ana bildirir ki, həyat yoldaşı ilə birlikdə uşağı stomatoloq B.Rüstəmovun yanına aparıblar. Öncədən “Instagram” vasitəsilə həkimin köməkçisinin telefonunu tapıb, onunla danışmışlar.

“Bizi çıxardılar bayıra”

“Demişdi ki, sedasiya üsulu ilə müalicə olunacaq. Biz də elə bilirdik ki, ağrı hiss eləməsin deyə, iynə vurulur. Biz narkoz bilməmişik. Kabinetdə olanda bir xanım gəldi, sonradan bilmişəm ki, adı Fərəh Amanovadır. Onun anestezioloq olduğunu bilmirdik. Uşağın adını, yaşını soruşdu, bizi çıxardılar bayıra. Üvvəldən də həkim demişdi ki, gigiyena baxımından müalicə zamanı valideynləri içəri saxlamırıq.”
Valideynlər dörd disin müalicəsinin, azı, yarım saat çəkəcəyini nəzərə alıb xəstəxananın kafesinə gediblər. Bir qədər sonra diş həkiminin kabinetinə qayıtdıqlarında orada həyacan yaşandığını görüblər.
S. Mehdiyeva deyir ki, övladının başına bir iş gəldiyini dərhal anlayıb, amma qapını bağlayıb, onlara içəri buraxmayıblar. Ölündü elektrosok aparatı ilə təcili kabinetə gələn həkim üçün qapını açanda ata da içəri daxil olub: “Görüb ki, uşağı yerə uzadıblar, ürək masajı edirlər. Yoldaşımı dərhal çıxarıblar. Həmin vaxt dəhlizdə mən də huşumu itirmişəm. Məni xəstəxananın təcili yardım şöbəsinə aparıblar. Sonra Xədicəni reanimasiya köçürüblər. Üç gün orada qaldı. Sonra Mərkəzi Klinik Xəstəxanaya apardıq. Uşaq bir ay öz hesabımıza orada qaldı. Oyanma olmadı…”

20 dəqiqə oksigensiz?

Ananın sözlərinə görə, koma vəziyyətində olan xəstə qidani özü çeynəyə bilmir. Bu üzdən, aptekdən Xədicə üçün hazır qidalar alırlar, onu uşağın boğazından mədəsinə necə ötürməyi də öyrəniblər. Ümumiyyətlə, Babazadə ailəsi uşaq üçün evdə xəstəxanaya bənzər şərait yaradıb: “Uzun müddət hərəkətsiz qalan adamda əzələlər yeyilir. Bize demişdilər ki, özəl xəstəxanalardan birində yaxşı fizioterapevtlər var. Onlar da evə baha gəlir. Qohumlar bizə maddi yardım göstərdilər, bir ay fizioterapiya üçün orada yatırdıq. İstəyirdik ki, heç olmasa, otura bilsin, hamama apara bilək və s. O da olmadı. Heç bir irəliləyiş yoxdur. İlk gün necə idisə, indi də elədir.”
S. Mehdiyeva müəllimdir, amma övladının durumu üzündən müvəqqəti işləmir, ona qulluq edir. O bildirir ki, hər ay təkcə Xədicənin baxımına 2 min 500 manat qədər pul xərclənir. Bura dərmanlar, aptekdən alınan hazır qidalardan tutmuş, əlavə baxım əşyalarına qədər müxtəlif xərclər daxildir. Dövlət isə ona toplam 570 manat pensiya və müavinət kəsib. Anası vurğulayır ki, bu, heç aylıq yeməkpuluna çatmır.
X. Babazadənin müalicəsindən ötrü valideynləri həm yerli, həm də xarici həkimlərlə ünsiyyətdədirlər. Anası İsraildə, Türkiyədə çalışan həkimlərdən məsləhət alır. Beyin müayinəsinin nəticələrini İsraildəki həkimlərə göndəriblər: “Dedilər ki, rəyə görə beynin beş dəqiqə oksigensiz qaldığı yazılıb, amma, azı, 20 dəqiqə oksigensiz qalmalıdır ki, beyin bu vəziyyətə düşsün. Diskdəki beyin görüntüləri bunu deməyə əsas verir. Sadəcə, uşaq o qədər sağlam olub ki, ürək masajı ilə onun dayanmış ürəyinin fəaliyyətini reanimatoloq Rauf Pasayev bərpa edib. Tibbə görə, beyin hüceyrələri, uzadı, dörd dəqiqə oksigensiz qala bilər. Sağlam orqanizmdir, amma beyin yoxdur. Digər orqanlar işləyir, beyin yox.”
S. Mehdiyevanın sözlərinə görə, türkiyəli həkimlər də onlara eyni sözləri deyiblər. Onlar hətta evlərini satıb uşağı müalicəyə aparmaq istəyirlər, amma həkimlər bunun bir faydası olmayacağını bildiriblər.

Cinayət işi başlanıb

S. Mehdiyeva iddia edir ki, Səhiyyə Nazirliyinin Məhkəmə Tibbi Ekspertiza və Patoloji Anatomiya Birliyi qızının başına gələnlərlə bağlı obyektiv rəy vermir. Faktla bağlı Nərimanov rayon Prokurorluğunda Cinayət Məcəlləsinin 314.2-ci (səhiyyə üzrə ağır nəticələrə səbəb olan) maddəsi ilə cinayət işi başlanıb. İstər stomatoloq B.Rüstəmov, istərsə də anestezioloq F.Amanova yasananlara görə özlərini günahkar saymırlar.
Üç dəfə ekspertiza təyin olunub. Ekspert rəylərində də iddia edilir ki, “göstərilmiş ambulator tibbi xidmət səhiyyə sistemində qüvvədə olan müvafiq qaydalara uyğun olub.”
Ekspertlər yazır ki, tibbi xidmətdən öncə bütün lazımı müayinələr – qanının ümumi analizi, kardioloji müayinə aparılıb, rentgen olunub və s.
“Xədicə Babazadənin vəziyyətinin ağırlaşmasına səbəb anesteziya zamanı istifadə olunan anestetikə qarşı hiperhəssaslıq kimi dəyərləndirilir, xəstənin aldığı psixotrop dərmanlar risk faktoru hesab olunur,” – ekspertizanin rəyi bildirir. Hər dəfədə zərərçəkmiş tərəf narazı qalır, yenidən ekspertiza təyin olunsa da, nəticə dəyişmir.

İstintaq davam edir

S. Mehdiyeva rəy-də yazılanların yalan olduğunu deyir, məqsəd də övladını bu duruma salan həkimləri qorumaq, məsuliyyətdən kənarda saxlamaqdır: “Müstəntiqin əlində bizim xəstəxanaya getdiyimiz günə aid bütün görüntülər var. Qoysunlar ortaya nə vaxt Xədicədən qan analizi götürülüb, nə vaxt rentgeni aparılıb? Sonradan saxta sənəd hazırlayıb işin içinə tikməyə nə var?! Görüntü qoysunlar ortaya. Ekspert yazıb ki, psixiatra gedib, psixotrop dərman içib. Birincisi, hiperaktiv uşaq olduğuna görə iki il əvvəl getmişdi, o vaxt içilən dərmanın təsiri qalmır. İkincisi, Fərəh Amanova niyə yoxlamadan narkoz verib?”
11 yaşlı Xədicənin başına gələnlərlə bağlı Nərimanov rayon Prokurorluğunda istintaq davam edir. AzadlıqRadiosu