Azərbaycan Qida Təhlükəsizliyi Agentliyinin tabeliyində fəaliyyət göstərən Qida Təhlükəsizliyi İnstitutu, 11.02.2025-ci il tarixində heyvanların identifikasiyası üçün istifadə olunan birkaların satın alınması ilə bağlı açıq tender keçirilmişdir. Tenderin qalibi “PLASTPROF” Məhdud Məsuliyyətli Cəmiyyəti seçilmişdir. MMC ilə 466.690,00 manat məbləğində satınalma müqaviləsi bağlanılması nəzərdə tutulur.

Qeyd edək ki, bu, Qida Təhlükəsizliyi İnstitutunun “PLASTPROF” MMC ilə ilk əməkdaşlığı deyil. İnstitut, xirdabuynuzlu və iribuynuzlu heyvanların identifikasiyası üçün istifadə olunan birkaların satın alınması məqsədilə 25.07.2024-cü ildən “PLASTPROF” MMC ilə 460.200 manat məbləğində satınalma müqaviləsi bağlamışdır.

Tenderin şərtlərinə görə, “PLASTPROF” MMC İnstituta 100.000 cüt xirdabuynuzlu heyvanlar üçün nömrələnmiş vizual birka, 350.000 cüt iribuynuzlu heyvanlar üçün nömrələnmiş vizual birka təmin etməli olub. Bundan əlavə, Qida Təhlükəsizliyi Institutu 23.01.2024-cü ildən də “PLASTPROF” MMC ilə bir satınalma müqaviləsi bağlamışdır. Bu müqavilənin şərtlərinə görə, MMC 589.964,6 manata iribuynuzlu heyvanlar üçün nömrələnmiş 500 min cüt vizual birka, atlar və dəvələrin identifikasiyası üçün istifadə olunan 3 min ədəd radiotezlikli nisanlanma vasitələri ilə təmin etməlidir.

Göründüyü kimi, Qida Təhlükəsizliyi İnstitutu ötən il “PLASTPROF” MMC ilə ümumi dəyəri 1.050.164 manat olan iki satınalma müqaviləsi bağlamışdır. Hazırda 466.690,00 manat dəyərində bir satınalma müqaviləsinin bağlanılması da gözlənilir.

Məlumat üçün bildirək ki, tenderin qalibi olan “PLASTPROF” MMC, Qida Təhlükəsizliyi İnstitutunun verdiyi müsabiqə elanından cəmi bir ay əvvəl — 3 oktyabr 2023-cü il tarixində dövlət qeydiyyatına alınmışdır. Tender müsabiqəsi isə 7 noyabr 2023-cü ildən elan olunub. Nizamnamə kapitalı 10 manat olan MMC-nin hüquqi ünvanı Yasamal rayonu, Nazim Hikmət, ev 26/76, m. 30-da yerləşir. MMC-nin qanuni təmsilçisi İmirov Elməddin Zahir oğludur.

MMC-nin ilk qanuni təmsilçisi isə Hüseynov Mirhəbib Etibar oğludur. “Dövlət satınalmaları haqqında” Qanunun 6-cı maddəsində malgöndərənlərin (podratçıların) ixtisasına dair tələblər yer almışdır. Həmin maddənin 6.2.1 bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığın, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlılığının olması lazımdır. Lakin Qida Təhlükəsizliyi İnstitutu Nazirlər Kabinetinin 30 dekabr 2023-cü il tarixli 494 nömrəli Qərarının tələblərini ciddi şəkildə pozmuşdur.

Davamında, qeyd etmək lazımdır ki, “Plastprof” MMC qısa müddətdə dövlət qeydiyyatına alınmasına baxmayaraq, Kənd Təsərrüfatı Nazirliyinin tabeliyindəki Üzümçülük və Şərabçılıq Elmi-Tədqiqat İnstitutu ilə dərman, sarğı ləvazimatları və materiallarının satın alınması, bioloji aktivlərin alınması üzrə iki müqavilə bağlamışdır. Ayrıca, Aqrar Xidmətlər Agentliyinin tabeliyində olan Laboratoriya, Ekspertiza və Sertifikatlaşdırma Mərkəzi üçün pestisid və gübrələrin satın alınması üzrə 126.357,79 manat dəyərində müqavilələr imzalanmışdır.

MMC ötən ilin dekabrında “Naxçıvan Aqrar Xidmətlər Mərkəzi” publik hüquqi şəxs ilə xüsusi təhlükəli heyvan xəstəliklərinin profilaktikası, diaqnostikası, müalicəsi və ləğvi məqsədilə vaksinlərin satın alınması üzrə 797.614,96 manat məbləğində müqavilə, “Azərbaycan Yaşıllaşdırma və Landşaft Quruluşu” Açıq Səhmdar Cəmiyyəti ilə ting və toxumçuların yetişdirilməsi, salınmış yaşıllıqlara düzgün agrotexniki qulluq göstərilməsi üçün tələb olunan gübrələrin və dərman preparatlarının satın alınması üzrə 99.938,1 manat məbləğində müqavilə bağlamışdır.

Göründüyü kimi, “Plastprof” MMC ayrı-ayrı dövlət qurumlarının keçirdiyi müxtəlif satınalmaların qalibi olmuşdur. Maraqlıdır ki, Qida Təhlükəsizliyi İnstitutunu, rəsmi veb-səhifəsi və hətta sosial şəbəkə hesabı olmayan bu şirkətlə əməkdaşlıq etməyə nə sövq edib.

Qalib şirkət haqqında yeganə məlumat budur ki, MMC-nin qanuni təmsilçisi İmirov Elməddin Zahir oğlu, 20 Noyabr 2023-cü il tarixində Nərimanov rayonu, İlqar Qaibov ev 12, m. 1222 ünvanında dövlət qeydiyyatına alınan “Optimus Auto” MMC (VÖEN -1506599781) adında şirkətin də qanuni təmsilçisidir.

Qida Təhlükəsizliyi İnstitutunun direktoru isə Əli Nəbiyevdir. 1993-cü ildən Bakıda anadan olmuş Əli Nəbiyev, Bakı Dövlət Universitetini hüquqşünaslıq ixtisası üzrə bitirmiş, Ədliyyə Nazirliyində, “Azərbaycan Dəmir Yolları” QSC-də müxtəlif vəzifələrdə çalışmışdır. 21 iyul 2023-cü ildən Azərbaycan Respublikası Qida Təhlükəsizliyi Agentliyinin sədri tərəfindən Azərbaycan Qida Təhlükəsizliyi İnstitutunun İdarə Heyətinin sədri vəzifəsinə təyin edilmişdir.