Hüriyyet.az saytının redaksiyasına bir qrup sahibkar tərəfindən göndərilmiş şikayət məktubu daxil olub. Şikayətçilər adlarının açıqlanmasını istəmirlər. Onlar, Dövlət Gömrük Komitəsinin fəaliyyəti ilə bağlı narazılıqlarını bildirirlər. Aşağıda onların müraciətini olduğu kimi dərc edirik:

“Biz, heç kəsə möhtac olmaq istəməyən vətəndaşlar olaraq, çörəyimizi qazanmaga, ailəmizi dolandırmağa çalışırıq. Biz avtomobil alveri ilə məşğul oluruq. Lakin bildirmək istəyirik ki, "Meyvəli" gömrük terminalında gündən-günə qiymətlər artmaqdadır. Bir ay ərzində heç bir səbəb olmadan iki dəfə qiymət artımı edilib.

Biz milyon qazanmırıq. Bizim də ehtiyacımız var, biz ziyanla da işləyirik. Bu qədər qiymət artımına baxmayaraq, gömrükçülərin rəftarı da həddindən artıq kobuddur. Xidmət səviyyəsi isə sıfırdır. Həm pul veririk, həm də bizi borclu çıxarırlar. 10-15 dəqiqədə həll olunası məsələləri saatlarla uzadırlar. Bu qədər də olmaz, axı? Bu ölkə tək rüsvxorlardan ibarət deyil. Bu ölkədə qanun-qayda var.

Harinlamış məmurlar “yuxarı” toplanıblar, aşağı təbəqədə olan insanları ayaqları ilə əzirler. Xahiş edirik, "Meyvəli" gömrük terminalı nəzarətə alınsın. Elə bir kobudluq edirlər ki, sanki onları orada məcbur işlədirlər. Hələ bir minnət də edirlər. “Hara istəyirsən şikayət et, kim baxacaq sənin şikayətinə?!” – deyirlər. Bir sözlə, bizi işimizdən soyudublar.”

Şikayət məktubunda qeyd edilənlər, gömrük terminalında olan sistemsizlik və məmurların kobud davranışları ilə bağlı insanları narahat edir. Şikayətçilər, həmçinin gömrük xidmətinin qeyri-peşəkar yanaşmasını, qiymət artımlarının səbəbsiz olduğunu və bu cür davranışların iş mühitini mənfi yöndə təsir etdiyini vurğulayırlar.

Redaksiyadan: Qarsı tərəfin mövqeyini dərc etməyə hazırıq.