X?b?r verdiyimiz kimi, “Melissa Group” tikinti sirk?tinin işçiləri bu gün paytaxtın Yasamal rayonu, Birinci Alatava yaşayış massivi, Abdulvahab Salamzadə küçəsi, 118B ünvanında içərisində yaşayan evin bir hissəsini dağıdıb.

Bununla bağlı görüntülər sosial şəbəkədə yayıldıqdan sonra hadisəni törədən sirkətin iş icraçısı və ekskavator sürücüsü saxlanılıb. DİN-dən verilən məlumata görə, faktla bağlı Cinayət Məcəlləsinin müvafiq maddələri üzrə cinayət işi açılıb və araşdırma aparılır.

“Melissa Group” tikinti sirkətinin sahibi Qalib Məmmədov, baş direktoru isə Xəzər Məmmədovdur.

Qeyd edək ki, “Melissa Group” dəfələrlə bu cür qalmaqalların mərkəzində gəlib. Maraqlısı isə odur ki, sirkətdən narazı olanlar yalnız evi başına uçurulan, lazımi kompensasiyanı ala bilməyənlər deyil, həm də “Melissa Group”un xidmətindən istifadə edənlər, ondan ev alanlardır.

Bakupost.az-ın araşdırmasına görə, vəziyyət o həddə çatıb ki, “Melissa Group”a daxil olan MTK-ların yüz cür fırıldağından bezən sakinlər müxtəlif sosial şəbəkələrdə səhifə və kanallar yaradıb. Məsələn, Facebook-da "Melissa Park (ASP MTK) kompleksinin şikayətçi sakinləri" adli qrup yaradılıb. YouTube-da da eyni adla kanal açılıb. İstifadəçilər tez-tez bu səhifə və kanallarda “Melissa Group”un özbaşınalıqlarını əks etdirən yazı, foto və videomaterialları paylaşırlar.

Bəs, “Melissa Group” sakinlərin başına hansı oyunları açır?

Bakupost.az bununla bağlı yaxın keçmişə aid olan bəzi faktları təqdim edir.

Birinci fakt. Bir müddət əvvəl Həsən bəy Zərdabi prospekti, 92 A ünvanında yerləşən “ASP” MTK (ticarət nişanı “Melissa Group”) yaşayış kompleksinin sakinləri yaşadıqları binada əsasız qiymət artımından şikayət edirdilər. Sakinlər bildirirdilər ki, sözügedən yaşayış kompleksinin qarajında standart parkinq yerləri üçün aylıq ödənişlərin 75 manatdan başlayacağı qeyd edilən elan vurulub. Halbuki buna qədər parkinq yerləri üçün aylıq ödəniş 50 manat idi. Belə ki, “ASP” MTK parkinq üçün qiymətləri birdən-birə 25 manat qaldırmışdı. Lakin bu hələ harasıdır? Sakinlərin dediyinə görə, illərdir aylıq ödəniş edilən zaman onlara heç bir sənəd verilmir. Bu səbəbdən də xidmət göstərən tarifin rəsmi şəkildə müəyyənləşdirilməsi mümkün deyil. İkincisi, 75 manat müqabilində göstərilən xidmətin məzmunu və xidmət göstərən tarifin öhdəlikləri də bəlli deyil. Üçüncüsü, sakinlər faktiki olaraq, yaşadıqları binaya girmək üçün slaqbaumun qaldırılmasına görə pul ödəməyə məcbur edilirdilər. Dördüncüsü, bu üsulla şirkət vergidən yayılır və dövlət büdcəsinə ödənilməli olan külli miqdarda pul mənimsənilir.

İkinci fakt. ASP MTK-nin istifadəyə verdiyi binalardan birində CityNet provayderinin xidməti heç bir səbəb göstərilmədən ləğv edilib. Əvəzində sakinlər “Melissa Group”un provayderi (Sline) qoşulmağa məcbur ediliblər.

Üçüncü fakt. "Melissa Group" istifadəyə verdiyi əksər binalarda sakinlərin binanın idarəçiliyi üçün MMC yaratmasına müxtəlif üsullarla mane olur, əvəzində özü MMC yaradır və istismara verilmiş binaların idarəçiliyindən də xeyli qazanc əldə edir. Buna nail olmaq üçün sirkətin işçiləri özlərini sakin və ya qonşu kimi təqdim edir, imza toplayırlar. Bu alınmayanda isə onlar imzatoplamanı guya MTK-nın ləğvi bəhanəsi ilə həyata keçirirlər. Sakinlərin dediyinə görə, bu MMC-lər heç də xidmət göstərmək üçün deyil, onlara soymaq üçün yaradılır.

Bütün bunlar, sakinlərin “Melissa Group”la bağlı narazılıqlarının cüzi bir hissəsidir. Neçə illərdir, dövlət qurumları sakinlərin bu kimi şikayətlərinə baxmadıqları üçün “Melissa Group” artıq içində insanların yaşadığı binanı onların başına yıxmaqdan belə çəkinmir.




Nahid, BakuPost