Astara Rayon İcra Hakimiyyətinin Tender İcmalı

Astara rayon İcra Hakimiyyəti ötən il 9 tender keçirib. Tribunainfo.az xəbər verir ki, bu tenderlərin beşinin nəticələri müxtəlif səbəblərdən ləğv olunub. Ləğv olunan tenderlərdən birinin maliyyələşdirilməsi Anti İnhisar və İstehlak Bazarına Nəzarət Dövlət Xidmətinin tərəfindən dayandırılıb. Səbəb isə tenderin qalibi olmuş şirkətlərin arasında gizli sövdələşmənin müəyyən edilməsi olub.

Tribunainfo.az-ın araşdırmasına görə, ləğv olunan tenderlərlə bağlı qanunvericiliyin tələblərinin pozulması səbəbindən protokol tərtib edilib. Araşdırma zamanı isə Astara İcra Hakimiyyətinin nəticələri tanınan 4 tenderi üç şirkət arasında bölüşdürdüyü aşkar edilib. Bu müsabiqələrin toplam dəyəri 1 milyon 79 min 488 manat təşkil edir. Müsabiqələrin əsas qalibi “Elnur-2” Universal İstehsalat Kommersiya Şirkəti olub. İki tenderin qalibi olmuş şirkət, İcra Hakimiyyəti ilə 703 min 588 manatlıq satınalma müqaviləsi bağlayıb.

Digər iki tender, “ASA-TIKINTI” MMC (102 min 848 manat) və “TOPXANA LAYİHƏ İNSAAT” MMC (273 min 52 manat) arasında paylaşılıb. Astara İcra Hakimiyyətinin “Elnur-2” şirkətinə bu qədər etimad göstərməsi maraqlıdır. Bakı şəhəri, Binəqədi rayonu, Süleyman Sani Axundov küçəsi, ev 11/35, mənzil 57 ünvanında hüquqi qeydiyyatda olan “Elnur-2” Universal İstehsalat Kommersiya Şirkəti 11 fevral 1994-cü ildən qeydiyyata alınıb. Nizamnamə kapitalı 1.60 manat olan şirkəti Abiyev Zaur Niyaz oğlu rəhbərlik edir.

Məsələnin ikinci maraqlı tərəfi odur ki, “Elnur-2” şirkəti ilə Astara İcra Hakimiyyəti arasında tender anlaşması 2024-cü ildən əvvəllər də olub. Məsələn, 2019-cu ildə şirkət Astara Rayon İcra Hakimiyyətindən 2 milyon 233 min manatlıq tender qazanıb. Eləcə də, 2020-ci və 2023-cü illərdə də bu əməkdaşlıq davam edib.

Yuxarıda qeyd etdiyimiz tenderlərdən birinin ləğv edilməsinin səbəbinin gizli sövdələşmə olması da elə “Elnur-2” şirkəti ilə bağlı olub. Belə ki, AIIBNDX (Anti İnhisar və İstehlak Bazarına Nəzarət) şirkətlər arasında gizli sövdələşmənin olduğunu müəyyən edərək, onu prosesdən uzaqlaşdırıb. Hərçənd belə hali hüquq-mühafizə orqanları araşdırmalı və hüquqi rəy verməli idi. Eyni zamanda, “Elnur-2” şirkətinin də tenderlərə qatılmasına məhdudiyyət qoyulmalıydı. Lakin görünən odur ki, bu tələblərə məhəl qoyulmayıb. Niyəsini isə dəqiqləşdirmək imkanımız olmayıb.

Bundan əlavə, “Elnur-2” şirkətinin adı bir sıra qalmaqallara da qarışıb. Belə ki, şirkət öhdəliklərini yerinə yetirmədiyi üçün məhkəməyə verilib. Həmçinin, Zaur Abiyevin adı “MTN işi”ndə zərərçəkən kimi qeyd edilib.

Xatırladaq ki, Astara rayonunun icra başçısı Qazınfər Agayevdir.