Rayonlarda mədəniyyət mərkəzlərinin, kinoteatrların, kafelərin və digər istirahət mərkəzlərinin sayı çox azdır. Hətta bəzi rayonlarda heç yoxdur. Bu isə gənclərin inkişafına mənfi təsir edir. Bəs görəsən bu problemlərin həlli üçün hansı addımlar atılmalıdır?

Sosioloq Lalə Mehrali mövzu ilə bağlı Sonxeber.az-a açıqlama verib:

"Rayon gənclərinin mədəni inkişafı üçün imkanlar çox mhduddur. Xüsusilə qızlarımız üçün şərtlər ikiqat çətindir. Rayonlarımızın çoxunda gənclər mərkəzləri tikilib. Amma təəssüf ki, onların əksəriyyətinin qapılarında böyük bir qıfıl var. Dövlətin yaratdığı imkanlardan gənclərin istifadə etməsinə imkan verilmir. Gənclərin evlərində kitabxanalar, komputer otaqları, idman zalları var. Ancaq heç biri gənclərin istifadəsinə verilmir. Gənclərin evlərinin qapıları gənclərimizin üzünə bağlıdır. Əgər gənclər bu imkanlardan yararlana bilmirsə, onda o evlərin yaradılmasının məqsədi nədir?

Rayonlarda gənclərimiz maksimum çay evlərinə gedə bilir. Bu da, ancaq oğlanlar üçün mümkündür. Qızlarımız üçün vəziyyət daha pisdir. Gənclərimiz çay evində maksimum nə qədər inkişaf edə bilər? Kitabxanaların kitab bazaları yenilənməlidir, gənclərin mədəni inkişafı üçün mkanlar açılmalıdır. Amma bunların heç biri reallaşmır. Bütün bu səbəblərdən rayondan Bakıya oxumağa gələn gənclərin heç biri geri qayıtmırlar. Onlar Bakıda öz mədəni inkişafları üçün hər şəraiti görürlər və geri qayıtmaq istəmirlər.

Öz rayonlarında yerli icraedici orqanlar gənclərə bu imkanları yaratmadıqlarına görə onları itirirlər. İstənilən sahədə oxuyan gənc rayonuna qaydıb orada fayda verə bilər. Amma bu problemlərə görə qayıtmayıblar. Çünki, təhsillərinin qoyduğu kapitalın əvəzini rayonda ala bilmirlər.

Gənclərimizi rayonlara qaytarmaq üçün orada onların inkişafına və istirahətinə lazım olan məkaların sayını artırmaq lazımdır. Rayonlarda məkanların yaradılması, gənclərin mədəni və sosial fəaliyyətini artırmağa kömək edəcək, həmçinin onların mədəniyyətə olan maraqlarını artıra bilər. Beləliklə, bir çox gənc rayonlarda yaşayaraq, yerli icma ilə inteqrasiya ola və öz biliklərini inkişaf etdirə bilərlər.

Nəticədə, gənclərin inkişafı üçün yeni mədəniyyət mərkəzləri, kitabxanalar, idman sahələri və sosial fəaliyyətlər təşkil edilməlidir. Rayon gəncləri üçün yaradılan şərait yalnız onların peşəkar potensialını artırmağa deyil, həm də onların mədəni səviyyəsini yüksəltməyə xidmət edəcək. Bu məqsədlə dövlət və yerli icra orqanları bir araya gələrək, gənclərin inkişafına yönəlik daha çox layihələr həyata keçirməlidirlər.