Səbail rayonu, Badamdar qəsəbəsində, Badamdar sosesi ərazisində 35-40 illik saman ağaclarının kəsilməsi halı baş verib. Hadisə yerində olan əməkdaşımızın verdiyi məlumata görə, sözügedən ağacların “Bakinskiy dvorik” restoranının sahibi tərəfindən məhv edildiyi iddia olunur.

Hazırda ərazidə kəsilmiş ağacların yerində ağır texnikalar və fəhlələr çalışır, yeni bir inşa obyekti inşa olunur. Məsələyə bağlı Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova bildirdi ki, hazırda Dövlət Ekoloji Təhlükəsizlik Xidmətinin əməkdaşları tərəfindən həmin ərazidə müvafiq araşdırma aparılır.

Qeyd edək ki, Bayıl yamacında saman ağaclarının əkilməsi ulu öndər Heydər Əliyevin hakimiyyəti illərində həyata keçirilib. Bu tədbir, yamacın eroziyaya uğramasının və sürüşmələrin qarşısını almaq məqsədilə görülüb. 2015-ci ildə isə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyevanın təşəbbüsü ilə Badamdar qəsəbəsində ağac əkimi kampaniyası keçirilib və bu kampaniya çərçivəsində 1,500-dən çox müxtəlif ağac növləri əkilib.

Dövlətin bu sahəyə həssas yanaşmasına baxmayaraq, çox təəssüf ki, Bakıda ayrı-ayrı məmurlar və onlara bağlı olan sahibkarlar tərəfindən ağacların qanunsuz kəsilməsi ciddi ekoloji problemlərdən biri olaraq qalır. Son illərdə paytaxtımızda tikinti layihələrinin artması, yeni yolların salınması və kommersiya məqsədli aparılan fəaliyyətlər nəticəsində yaşıllıq əraziləri sürətlə azalır. Xüsusilə, paytaxtın mərkəzi hissələrində və dənizkənarı ərazilərdə köhnə ağacların kəsilməsi tez-tez ictimai narazılığa səbəb olur.

Ekologiya və Təbii Sərvətlər Nazirliyi tərəfindən ağacların qanunsuz qırılmasına qarşı tədbirlər görülsə də, cərimələr tətbiq edilsə də, ağacların məhv edilməsi faktları hələ də qalmaqdadır. Bu hadisə, ekoloji balansın pozulması, şəhərin yaşıl örtüyünün azalması və insanların sağlamlığına olan təhlükələr baxımından narahatlıq doğurur. Məsələnin həlli üçün müvafiq orqanların daha ciddi tədbirlər görməsi zəruridir.