Milli Aviasiya Akademiyasinda Mühazirə: "Rəqəmsal dövr və hüquq. Yeni çağırışlar"

Aprelin 18-i tarixinə Milli Aviasiya Akademiyasinda "Rəqəmsal dövr və hüquq. Yeni çağırışlar" mövzusunda mühazirə təşkil olunub. T tədbirdə Akademiyanın professor-müəllim heyəti, tələbələr, Baş Prokurorluğun əməkdaşları, hüquqşünaslar və media nümayəndələri iştirak ediblər.

Tədbirdə çıxış edən Baş Prokuror Kamran Əliyev bildirib ki, 2021-ci ildən etibarən Baş Prokurorluqla Milli Aviasiya Akademiyası arasında qurulan əməkdaşlıq əlaqələri bu gün uğurla davam edir və yeni məzmunla zənginləşir. O, mühazirədə "Rəqəmsal dövr və hüquq. Yeni çağırışlar" mövzusunda ətraflı məlumat verərək, rəqəmsallaşmanın hüquq sahəsində yaratdığı imkanlar və qarşıya çıxan çağırışlar haqqında danışıb.

Mühazirə zamanı rəqəmsallaşma ilə bağlı qanunvericiliyə əlavə və dəyişikliklərin edilməsinin məqsədli olduğunu bildirən Baş Prokuror, Baş Prokurorluq tərəfindən hazırlanmış qanun layihəsinin müzakirə olunması üçün aidiyyəti üzrə göndərildiyini təqdim edib. Layihədə Cinayət-Prosessual Məcəlləsinə elektron formada sübutların toplanması, kompüter məlumatlarının sübut kimi qəbul edilməsi və mühafizəsi, kompüter sisteminə baxış, axtarış və götürülməsi, elektron cinayət-prosessual fəaliyyətin həyata keçirilməsi ilə yanaşı, digər əlavələr və dəyişikliklərin təklif olunduğu qeyd edilib.

Vurğulanıb ki, bu təkliflər müasir texnologiyaların hüquq-mühafizə fəaliyyətinə tətbiqinin genişləndirilməsi və effektivliyinin artırılmasını hədəfləyir. Baş Prokuror, həmçinin "Elektron məhkəməyə dair icraat" informasiya sisteminin təsis olunması ilə bağlı təkliflərini ictimaiyyətlə bölüşüb. Bu sistem, cinayət-prosessual fəaliyyətin bütün mərhələlərini rəqəmsal mühitdə həyata keçirərək, istintaq və təhqiqat orqanlarının fəaliyyətinin şəffaflığını artıracaq, prosesin sürətini və səmərəliliyini yüksəldəcək. Eyni zamanda, cinayət prosesinin iştirakçılarına öz hüquq və vəzifələrini operativ şəkildə yerinə yetirmək imkanı yaradacaqdır.

Mühazirə zamanı, həmçinin 2023-cü ilin aprel ayından tətbiq olunan "Elektron Prokurorluq" informasiya sisteminin prokurorluq orqanlarında iş proseslərinin rəqəmsallaşdırılması üçün əhəmiyyətinə, idarəetmədə çevikliyin və şəffaflığın təmin olunmasına, vətəndaş məmnunluğunun artmasına, eləcə də cinayət işlərinin məhkəmələrə elektron formada operativ və səmərəli şəkildə göndərilməsinin vurğulandığı qeyd olunub.

Qeyd olunanlarla yanaşı, mühazirənin gedişində məhkəmədə və cinayət mühakimə icraatının gedişində süni intellektin imkanlarından istifadəsi, bu sahədə xarici ölkələrin təcrübələrinə də toxunulub. Bu, hüquq sistemi üçün yeni çağırışları və problemləri aradan qaldırmağa yönəlmiş bir addım kimi qiymətləndirilir.